“Дунё ўзбеклари” тақдим этади: Неъматулло ИБРОҲИМ: ЯНГИ ҒАЗАЛЛАР
ЎЗИНГДАН-КУ!..
«Севибман!» деб садо чекдим… ва бу унлар Ўзингдан-ку!
Бу тунга дил нурин экдим… ва бу тунлар Ўзингдан-ку!
Ўқиб “Маснавий” баётин*, мунаввар бўлди бу ботин,
Нидо қилдим тутиб отинг, бу мазмунлар Ўзингдан-ку!
Бу Ишқинг ҳаддидин ошиб, бўлиб лол, ақлидин шошиб,
Адам бўлди* неча ошиқ… Бу маъдумлар* Ўзингдан-ку!
Неча Қайс кетдилар чўлга, неча ошиқ адо бўлган,
Неча ул сенсизин ўлган… Бу мажнунлар Ўзингдан-ку!
Ҳукм—Сендан, юким—Сендан… ким ул айро букун Сендан?
Жавоб кутдинг нечун мендан? Бу маҳкумлар Ўзингдан-ку!
Ўт эмди бир қошиқ қоним, рамаққа етди-ку жоним,
Чу Ишқсиз кечмади оним… Бу мавсумлар Ўзингдан-ку!
————————————————————–
*Абёт—байтлар (“Маснавий” байтлари).
*Адам бўлмоқ—маҳв бўлмоқ, ўлмоқ.
*Маъдум—йўқ қилинган (ўлдирилган).
———————————–
2015 йил. 19 август.
БИЗ ОШИҚЛАР…
Биз ошиқлар неча йиллар нидо қилдик, нидо қилдик,
Сенингдек Бир Шаҳаншоҳга бу кўнгилни гадо қилдик.
Кечирдик лаҳзалар ичра асрлик туйғулар тотин,
Ва бу ишқнинг зуҳуротин сафо қилдик, сафо қилдик…
Биз ошиқлар неча айём ичиб ҳижрон шаробидин
Бу махмурлик аро тинсиз сало қилдик, садо қилдик!
Биз ошиқлар сенинг Ҳуснинг шуоъсидин* бўлиб мастлар
Дайр айшин қазо қилдик ва унга алвидо қилдик.
Биз ошиқлар тутиб маскан бу Дунё бағрида беш кун,
Раёсатни* риё билдик, ҳамоқатни адо қилдик…
Биз ошиқлар кетиб бундан—жаҳолатга тўла дундан,
Ажр кутдик Улуғ Кундан…* Видо қилдик, видо қилдик!
———————————————————-
*Шуоъ—нур.
*Раёсат—ҳукмдорлик (дунё ҳукмдорлиги).
*Улуғ Кун—Маҳшар куни (қиёмат).
————————————————
2015 йил. 19 август.
