Путиннинг собиқ маслаҳатчиси АҚШда ўлик ҳолда топилди
Путиннинг собиқ маслаҳатчиси АҚШда ўлик топилди
-
7 Ноябр 2015
Россия Президенти Владимир Путиннинг собиқ маслаҳатчиси Вашингтонда ўлик топилган.
Россия расмийларига кўра, собиқ матбуот вазири ва бир вақтлар қудратли Газпром-Медия Холдинг компаниясининг раҳбари бўлган 57 ёшли Михаил Лесин пайшанба куни оламдан ўтган.
Унинг оиласидан иқтибос келтираётган Россия матбуоти у юрак хуружидан ўлганини ёзмоқда.
Россия элчихонасига кўра, жаноб Лесиннинг жасади Дюпонт Серкл меҳмонхонасидаги хонада топилган.
Вашингтон Пост ёзишича, полиция бир эркак кишининг ўлимини текширмоқда, аммо унинг шахсини расман аниқламаган.
Ўтган йили Миссиссипи сенатори Рожер Викер жаноб Лесиннинг бойлиги «жиддий саволларни уйғотади» дея, унинг тергов қилинишига чақирганди.
АҚШ Адлия вазирлигига йўллаган мактубида Сенатор Викер давлат мулозими бўлиб ишлаган жаноб Лесин қандай қилиб Лос Анжелесда ўз оиласи учун 28 миллион долларга уй сотиб олгани сўралган.
Сенаторнинг хавотирича, мазкур уй савдосида АҚШ санкциялари остига тушган шахс ёки гуруҳлар турган бўлиши мумкин.
Жаноб Лесин Россия матбуот бозори ва ҳукуматидаги энг катта таъсирга эга бўлган шахслардан бири деб кўриларди.
2004 ва 2009 йиллар орасида президентга маслаҳатчи бўлиб ишлаган Лесин ҳукуматпараст Russia Today телеканалининг ташаббускорларидан биридир.
Тасс хабарига кўра, жума куни Президент Путин жаноб Лесиннинг «Россия матбуотига қўшган йирик ҳиссаси»ни олқишлади.
Ўтган йили жаноб Лесин ўзи ҳиссадор бўлган радио станцияда мухолифатчи Алексей Навальный билан суҳбатни тўхтатишга уринганликда айбланганди.
Сенатор Викер ўз мактубида жаноб Лесин «Кремлнинг Россиядаги мустақил телевизион каналларнинг овозини ўчириш ҳаракатларига бошчилик қилган»ини даъво қилган.
Би-би-си Ўзбек хизмати билан Whatsapp, Telegram ва Viber орқали боғланишни истасангиз, телефонимиз: +44 78-58-86-00-02.
ББС