Элбек Рахмат: Исмат Хушевнинг “Олий даргоҳ ёнмоқда” Мақоласини ўқиб

---

Элбек Рахмат:  

ҲАЁТ ДЕГАНЛАРИ НАҲОТ ШУ БЎЛСА

 

Исмат Маҳмудович Хушевнинг

“Олий даргоҳ ёнмоқда”

Мақоласини ўқиб ёзилган шеърий дилнома

 

Умри азиз ўтиб бормоқда.,

Халқнинг ризқи ҳануз чаноқда,

Не улуғлар чирир қамоқда.,

Ҳаёт деганлари наҳот шу бўлса?!

“Олий даргоҳ ёнмоқда”  депсиз,

Пулсизларнинг ғамини епсиз..,

Порахўрлик авж олди чексиз   –

Ҳаёт деганлари наҳот шу бўлса?!

Хабар беринг нозирликларга,

Шайлансинлар  ҳозирликларга,

Ўт кетмоқда вазирликларга –

Ҳаёт деганлари наҳот шу бўлса?!

Пахтакорнинг кўзларида ёш,

Мардикордир қавму қариндош,

Оилага хотин – халаж бош –

Ҳаёт деганлари наҳот шу бўлса?!

Кўзинг очиб қарасанг сергак,

Қишлоқларда қолмапти эркак,

Ёш келинлар бўлипти эрмак  –

Ҳаёт деганлари наҳот шу бўлса?!

Эр зотининг эгилган боши,

Ҳамёни бўш, йўқдир маоши.,

Насибаси маломат тоши –

Ҳаёт деганлари наҳот шу бўлса?!

Тадбиркорни эзар солиқлар,

Ваъдасидан тонди холиқлар,

Лақаблари бўлди балиқлар –

Ҳаёт деганлари наҳот шу бўлса?!

Қишлоқларда чироқлар ўчган,

Зангор олов тезакка  кўчган,

Қанча ҳоким, қамалган қочган –

Ҳаёт деганлари наҳот шу бўлса?!

Қозиларнинг оғзи ямалган,

Мард одамнинг кўпи  – қамалган,

Судланмаган одам қолмаган –

Ҳаёт деганлари наҳот шу бўлса?!

Қилич сермар жоҳил сармастлар,

Қочиб қолди., Солиҳ, Исматлар,

Эл бошида оғир қисматлар –

Ҳаёт деганлари наҳот шу бўлса?!

Исроиллар талади бизни,

Исмоиллар талади бизни,

Ололмадик ҳеч ҳақимизни –

Ҳаёт деганлари наҳот шу бўлса?

Шоирларнинг кўксида армон,

Талон – тарож бўлдику “Дўрмон”,

Матбуотмас ёнмоқда ўрмон –

Ҳаёт деганлари наҳот шу бўлса?!

Ичимизда маддоҳ хоинлар,

Хоинларнинг кўзин ўйинглар,

Булар бари эски ўйинлар –

Ҳаёт деганлари наҳот шу бўлса?!

Таладилар олдин ўзлари,

Хотинлари, сўнгра қизлари,

Титрамоқда энди тизлари –

Ҳаёт деганлари наҳот шу бўлса?!

Бор жаҳонга бўлиб шарманда,

Боқиманда бўлдик  Ватанда,

Аёлларнинг  шаъни бир танга –

Ҳаёт деганлари наҳот шу бўлса?!

Ёзган билан ҳеч бўлмас адо,

Дуо билан даф бўлмас вабо,

Золимларни урмасми Худо –

Ҳаёт деганлари наҳот шу бўлса?!

Лойқаланди тоза булоқлар,

Қўчқорман дер эчки, улоқлар,

Бир – бирини сотар қулоқлар –

Ҳаёт деганлари наҳот шу бўлса?!

Осмон йироқ, тош қаттиқ замин,

Ҳурриятнинг тотолмай таъмин,

Ҳатто Шерлар чиқармас дамин –

Ҳаёт деганлари наҳот шу бўлса?!

Элбек дерлар менинг отимни,

Туркистондан изланг зотимни,

Синдирдилар қўш қанотимни –

Ҳаёт деганлари наҳот шу бўлса?!

Садоқатдир биз билган таълим,

Кўп мард эди., Маҳмуд муаллим,

Қолган гаплар Сизларга маълум –

Ҳаёт деганлари наҳот шу бўлса?!

23.08.13.

“Дунё ўзбеклари” учун махсус

МАҚОЛАНИ ДЎСТЛАР БИЛАН БАҲАМЛАШИНГ